SEO-ya Uyğun Mətn Necə Yazılmalıdır?

SEO-ya uyğun məzmunu anlamaq üçün əvvəlcə SEO anlayışına nəzər salmalıyıq. Yəqin ki, bir çoxunuz SEO-nu eşidib, amma dəqiq nə demək olduğunu tam başa düşməmisiniz. Narahat olmayın, bunu çox sadə şəkildə izah edəcəyik. SEO nədir? 

   Gəlin sadə dillə danışaq: SEO (Search Engine Optimization), yəni Axtarış Motoru Optimizasiyası, saytınızı Google kimi axtarış motorlarında daha görünən etmək üçün etdiyiniz bütün işlərin ümumi adıdır. SEO-nun əsas məqsədi, insanlar Google-da bir şey axtardıqda, sizin veb-saytınızın ilk səhifələrdə çıxmasını təmin etməkdir. 

  SEO-ya uyğun məqalələr yazmaq çətindirmi?

     SEO-ya uyğun məqalələr yazmaq düşündüyünüz qədər çətin deyil, amma burada əsas olan bir neçə vacib məqam var ki, bunları unutmaq olmaz. İlk növbədə, məzmunun keyfiyyəti və orijinallığı ön planda olmalıdır. Elə təsəvvür edin ki, siz sadəcə Google üçün yazmırsınız, oxucularınızın qarşısında oturub onlarla söhbət edirsiniz. Məqaləniz oxucunun marağını cəlb etməli, ona faydalı məlumatlar verməli və onu uzun müddət saytınızda saxlamalıdır.

Yəni, burada əsas məqsəd oxucunu düşünməkdir. Təcrübəmizə əsasən deyə bilərik ki, əgər məqalənin ilk cümlələri oxucunun diqqətini çəkirsə və maraq doğurursa, oxucu saytda daha çox vaxt keçirir. Yəni, yazının əvvəlindən maraqlı bir üslub seçsəniz, oxucu davamını oxumağa həvəslənəcək və saytı tərk etməyəcək. Qısaca deyə bilərik ki, ilk cümlələr nə qədər cəlbedici olsa, oxucu da məqaləni sona qədər oxuyar.

Keyfiyyətli Məzmunun SEO-da Rolu

    Bəzi mətn yazarları düşünür ki, SEO-ya uyğun məqalə yazmaq sadəcə mətni açar sözlərlə doldurmaqdan ibarətdir. Yəni, açar sözləri nə qədər çox istifadə etsələr, Google-da ən üst sıralara çıxacaqlarını zənn edirlər. Amma, açıq danışmalı olsaq, bu yanaşma həm oxucunu bezdirir, həm də Google artıq bu cür fəndləri çox yaxşı anlayır. Oxucular belə məqalələrdə axtardıqlarını tapa bilmədikdə, saytı tez tərk edirlər.

     Nəticədə, saytın “sıçrama dərəcəsi” artır, yəni insanlar saytda az müddət qalırlar ki, bu da uzunmüddətli nəticələrə mənfi təsir göstərir. Sadəcə açar sözlərlə dolu bir mətn yaratmaq yetərli deyil. Əslində, yaxşı SEO məqaləsi həm oxucunun marağını çəkməli, faydalı məlumat verməli, həm də axtarış motorları üçün optimallaşdırılmış məzmun yaratmalıdır.

Siz əgər həqiqətən orijinal və keyfiyyətli məzmun yaratsanız, oxucu sizin məqaləni oxuyacaq, yazılarınızı paylaşacaq və hətta dostlarına da məsləhət görəcək. Bu, saytda qalma müddətini artırmaqla yanaşı, Google-un gözündə də sizi daha dəyərli edəcək. SEO-nun əsas məqsədi də budur: insanlara faydalı məlumatlar vermək və onları saytda daha uzun müddət saxlamaq.

Qeyd edək ki, SEO-ya uyğun məzmun yazarkən Google-un qaydalarını unutmamalısınız. Açar sözlərə uyğun məqalə yazmaqla yanaşı oxucunu düşünmək və ona faydalı məzmun təqdim etmək mütləqdir. Mətndə açar sözləri olduğu kimi, dəyişdirmədən və lazımi yerlərdə düzgün şəkildə istifadə etmək və eyni zamanda həddindən artıq yükləməkdən çəkinmək lazımdır. 

SEO öyrənmək və qaydalara uyğun məqalə yazmaq istəyən hər bir kəs bilməlidir ki, burada məqsəd təkcə Google-da yuxarı sıralarda olmaq deyil, həm də ziyarətçilərə həqiqətən faydalı və dəyərli məzmun təqdim etməkdir.

SEO-ya uyğun məqalə necə yazılır?

SEO-ya uyğun məqalə yazmaq üçün bəzi əsas prinsiplərə əməl etmək vacibdir. İlk növbədə, SEO-ya uyğun məqalə sadəcə orijinal və keyfiyyətli olmaqla bitmir, SEO kriteriyalarına da cavab verməlidir. Yəni, məzmun oxucuya faydalı olmaqla yanaşı, axtarış motorlarının tələblərinə də uyğun gəlməlidir. Bəs nədir axtarış motorlarının tələbləri?

•         SEO-ya uyğun məqalə yazmaq üçün əsas diqqət edilməsi vacib olan məqamlar arasında başlıq, məzmun və açar sözlərin düzgün seçilməsi yer alır. Təbii ki, təsirli vizualların istifadəsi də vacibdir, lakin oxucunu ilk cəlb edən başlıqdır. Təcrübə göstərir ki, insanlar məqaləni oxuyub-oxumamağa məhz başlığa görə qərar verirlər. Başlıqlarınızda qorxu, həyəcan, maraq kimi insan emosiyalarını aktivləşdirən elementlərdən istifadə etməklə oxucuları məqaləyə cəlb edə bilərsiniz. Buna görə də başlıqlar məzmunu qısa və aydın şəkildə əks etdirməlidir. 

•         SEO-ya uyğun mətn yazmağa başlamadan əvvəl düzgün açar sözləri müəyyən etmək lazımdır. İlk əvvəl veb-saytınız üçün hədəf kütlənizi müəyyən etməli və ona uyğun açar sözləri seçməlisiniz. 

•         Başlıqlar mətnin ən vacib hissələrindən biridir. Onlar məzmunu qısa, aydın və diqqət çəkici şəkildə oxucuya təqdim etməlidir. H1, H2, H3 və digər başlıq strukturlarından istifadə edərək məzmunu düzgün şəkildə bölmək, həm oxucunun, həm də axtarış motorlarının işini asanlaşdırır. Başlıqlar məzmunun əsas məqamlarını vurğulayır və oxucuya lazım olan məlumatı tez tapmağa kömək edir. Eyni zamanda, düzgün başlıqlar axtarış motorlarına məzmunun nədən bəhs etdiyini daha yaxşı başa salır, bu da SEO üçün çox faydalıdır.

•         Mətndə açar sözlərdən həddən artıq istifadə spam kimi görünə və saytınızın sıradan düşməsinə səbəb ola bilər. Məzmunun içində açar söz sıxlığı təxminən 5%-dən 8%-ə qədər olmalıdır.

•         Mətnin yazılmasında düzgün struktur qurmalısınız. Hər abzasda orta hesabla 4-5 cümlə olmalı və cümlələr sadə olmalıdır. Yersiz və predikatsız cümlələrdən çəkinin. Mənbələrə keçid vermək isə oxucunun saytda daha çox vaxt keçirməsinə şərait yaradır. SEO-ya uyğun məqalələr yazarkən ən vacib məqamlardan biri məzmunun unikallığıdır. Kopyalanmış məqalələr Google tərəfindən aşkar edilir və bunun müqabilində cəzalandırıla bilərsiniz. Buna görə də öz sözlərinizdən istifadə etməyə və məzmunu orijinal yazmağa səy göstərin.

•         Məqalələrinizə şəkillər, videolar və infoqrafikalar əlavə etməyi unutmayın. Google zəngin məzmunlu, vizuallarla dəstəklənən səhifələri daha yüksək qiymətləndirir, oxucular isə belə məzmunu daha maraqlı və cəlbedici tapır. Vizuallar məqalənizə rəng qatmaqla yanaşı, oxucunun diqqətini cəlb etməyə və məlumatı daha yaxşı başa düşməyə kömək edir. Yəni, həm SEO üçün, həm də oxucu təcrübəsi üçün vizuallar əlavə etmək vacibdir.

•         Məqalələriniz hər zaman yenilənməli, təkmilləşdirilməli və istifadəçilər üçün daha da faydalı olmalıdır. Unutmayın ki, əgər məzmun oxucularınıza dəyər verirsə, onlar orfoqrafik səhvləri bağışlayar, amma pis və SEO-nun detallarına uyğun olmayan məzmunu heç vaxt qəbul etməzlər. Oxucuların məmnunluğu və axtarış motorlarının dəyərləndirməsi uğurlu SEO strategiyasının açarıdır.

SEO-ya uyğun məqalələr yazarkən diqqət ediləcək nüanslar:

• Oxucuların başa düşəcəyi şəkildə sadə dildə yazın. 
• Mütəmadi olaraq məqalələrinizi yeniləyin. 
• Açar sözlərdən düzgün şəkildə və sayda istifadə edin. 
• Yorucu olmayan, lakin daha uzun məzmunlar yaradın. 
• Səbirli olun.

Unutmayın ki, SEO nəticələri bir gecədə əldə olunmur, bunun üçün səbirli olmalısınız. Yaxşı bir məzmunun Google-da ön sıralara çıxması zaman ala bilər. Sayta məqalələrinizi toplu şəkildə deyil, ardıcıl şəkildə yerləşdirməyiniz Google alqoritmi üçün daha yaxşı nəticələr əldə etməyinizə kömək edəcəkdir. Daimi yenilənən və müntəzəm olaraq paylaşım edilən məzmun saytınızın reytinqinə müsbət təsir etdiyini görə biləcəksiniz.

    SEO-ya uyğun məqalə yazmaq istəyirsinizsə, bilməyiniz vacib olan qaydalardan biri də açar sözlərə şəkilçilər əlavə etməmək və ya açar sözləri dəyişdirməməyinizdir. Məqalənin başından sonuna qədər məzmun bir mövzudan bəhs etməli, mövzu ilə bağlılığı qopmamalı və başladığınız mövzu ilə yekunlaşmalıdır. Qeyd edək ki, 300-400 sözdən ibarət qısa məqalələr artıq Google üçün çox vacib deyil. Oxucular indi daha ətraflı məlumat əldə etmək istəyir və detallı məlumat təqdim edən mənbələrə maraq göstərir. Buna görə də yazdığınız mətnlər uzun və məlumatlandırıcı olarsa, əldə edəcəyiniz nəticələr də yaxşı olacaqdır. 

Məqalənin indekslənməsi nədir və necə edilir? 

SEO-ya uyğun məqalə yazıldıqdan sonra ən vacib addımlardan biri də, məqalənizin Google serverlərində indeksləşdiyindən əmin olmağınızdır. Bəzən açar sözlərə diqqət yetirən yazarlar məzmunlarını yayımladıqdan sonra Google-da indekslənmədiyini bilmirlər. Qeyd edək ki, məqaləniz indekslənməyibsə, SEO cəhdləriniz əhəmiyyətini itirir.

İndeksləmə prosesinin doğru işləməsi üçün Google Search Console-dan istifadə edərək məqalənizi özünüz  yoxlaya və indeksləyə bilərsiniz. 

SEO-ya uyğun məqalə yazmağın üstünlükləri

SEO-ya uyğun məqalələrin çoxlu üstünlükləri var və bu, saytınızın axtarış motorlarında daha yüksək reytinqlərə çıxmasına, daha çox trafik qazanmasına və istifadəçi təcrübəsini yaxşılaşdırmasına kömək edir. Gəlin bu üstünlüklərə bir nəzər salaq:

1. Daha Yaxşı Axtarış Motoru Reytinqləri
   SEO-ya uyğun məqalələr yazarkən açar sözləri və oxucunun nə istədiyini nəzərə alsanız, saytınız axtarış motorlarında daha yüksək sıralarda görünəcək. Bu məqalələr, saytınızın doğru insanlara çatmasına kömək edən axtarış motoru optimizasiyasının əsas tərkib hissəsidir.
2. Artan Veb Sayt Trafiki
   Yaxşı SEO ilə saytınız daha çox insanın qarşısına çıxır. Google-da axtarış edənlər, açar sözlər üzrə sizin saytınızı tapıb daxil olurlar və beləliklə, üzvi trafikiniz artır. Saytınızın ilk səhifələrdə görünməsi, ziyarətçilərin sizə müraciət etmə ehtimalını qat-qat artırır.
3. Daha Yaxşı İstifadəçi Təcrübəsi və Müştəri Cəlbi
   SEO-ya uyğun məqalələr sadəcə açar sözlərlə dolu deyil, oxucuya dəyərli məlumat təqdim edir. Məhz bu faydalı məzmun oxucuların saytda daha çox vaxt keçirməsinə səbəb olur. Saytda axtardığını tapan istifadəçi ilə işiniz daha rahat gedir – onlar sizin xidmətlərinizdən istifadə etməyə daha çox meylli olurlar.
4. Artan Etibarlılıq
   Dəyərli, keyfiyyətli məzmun sizi sektorda etibarlı bir brend kimi göstərir. SEO-ya uyğun məqalələr brendinizin gücünü artırır və müştərilərinizin sizə inamını gücləndirir. Uzunmüddətli perspektivdə bu, daha loyallıq qazanmaq və etibarınızı artırmaq üçün mükəmməl bir yoldur.

SEO-ya uyğun məzmun yazmaq yalnız saytınıza daha çox ziyarətçi gətirməklə qalmır, həm də oxucunuza dəyər verir. Nəticədə isə həm siz, həm də oxucularınız qazanır!